ELIMU NA CHANJO VYATOLEWA KATIKA MAADHIMISHO YA SIKU YA UGONJWA WA KICHAA CHA MBWA DUNIANI

Imewekwa: September 27th, 2023

Elimu juu ya lishe, tiba pamoja na chanjo zimetolewa leo na wataalam toka Halmashauri ya wilaya ya Sikonge divisheni ya kilimo na mifugo. Ni katika zoezi la  maadhimisho ya  siku ya ugonjwa wa kichaa cha mbwa duniani,yanayofanyika katika viwanja vya Mnadani pamoja na viwanja vya Shule ya Msingi Sikonge.

Zoezi hili limeendeshwa vyema na Maafisa toka divisheni ya Kilimo na Mifugo ,Gelard Mwagalazi pamoja na Phildorine Linus  katika viwanja vya mnadani.Bw. Mwagalazi akizungumza na wateja waliofika kupata elimu na chanjo kwa ajili ya mbwa wao amesema ni vema wamiliki wa mbwa kuhakikisha kuwa wanawapatia mbwa wao chanjo ya kila mwaka kwa tarehe na mwezi husika ili kuwakinga mbwa wao dhidi ya ugonjwa hatari wa kichaa cha mbwa.

Kwa niaba ya Mkurugenzi Mtendaji wa Halmashauri ya Wilaya ya Sikonge,Mkuu wa Divisheni ya Kilimo na Mifugo Ndugu Hashim Kazoka ameridhishwa na mwamko wa wananchi wa Sikonge kwa kuja kupata elimu na chanjo kwa ajili ya kuwakinga mbwa wao dhidi ya ugonjwa hatari wa kichaa cha mbwa.

Amesisitiza kuwa ni muhimu kwa wanao fuga mbwa kuzingatia lishe na tiba ikiwa ni pamoja na kuwapatia dawa za minyoo,kuwaosha na  kuwafungia ndani.Matarajio yake ni kumaliza dozi zote mia tatu(300) walizopatiwa ndani ya siku mbili za maadhimisho ya siku ya ugonjwa wa kichaa cha mbwa duniani.

Zoezi hili ni endelevu hata baada ya siku ya kesho tarehe 28/09/2023 ambayo ndio kilele cha siku ya ugonjwa wa kichaa cha mbwa duniani.

Maadhimisho haya ni ya 16 tangu kuanzishwa kwa siku ya ugonjwa wa kichaa cha mbwa duniani mwaka 2007 ili kuinua ufahamu  juu ya ugonjwa hatari wa kichaa cha mbwa duniani.Takwimu toka Kituo cha kudhibiti magonjwa duniani ,zinasema takribani watu elfu sitini hufariki kila mwaka kutokana na ugonjwa hatari wa kichaa cha mbwa kote  duniani.